وعده وئردین گله جکسن سئوگیلیم

وعده وئردین گله جکسن سئوگیلیم
ساچلاریمی هوره جکسن سئوگیلیم
منله دئییب گوله جکسن سئوگیلیم
نئدن گئتدین،وعده وئردین گلمه دین

سنسیز دونیا منه داردی دولان گل
ترک وطن سنه عاردی دولان گل
کونلوم داها سنیق تاردی دولان گل
نئدن گئتدین،وعده وئردین گلمه دین

اوره ییم اود توتور یانیر ایچیمده
کوزه ریر کول اولور سونور ایچیمده
آرزیلاریم بیربیر اولور ایچیمده
نئدن گئتدین،وعده وئردین گلمه دین

بئله گئتدین هئچ بیر دونوب باخمادین
سون باخیشدا ایلدیرم تک شاخمادین
نه قئده ر گوزله دیم گلیب چیخمادین
نئدن گئتدین،وعده وئردین گلمه دین

باغلادیغین ایلقار هانی هارداسان
دئمه سنده من تک آهی زارداسان
من گوئنیده سن قوزئیده اورداسان
نئدن گئتدین،وعده وئردین گلمه دین