داستان از داستان های کهن بختیاری

داستان از داستان های کهن بختیاری
یه دالو بی یه بزی داشت. هی إدوشیس رووا ٱوی شیرس إخرد .یه روز دالو گو چه کنم چه نکنم اوی شیر دوشی نهاس من یه قاولمه نهاس سر تش .رووا ٱوی شیر خوره پوزس نها پوزس سو ،دستس نها دسس سو،پاس نها پاس سو دالو رسی روا فرار کرد .دینس کنده اوی من دست دالو .چند رو بعد رووا اوی گو دالو دینوم بده دالو هم گو رووا شیرم بده. ره تی بز گو بز شیر دم، شیر دالو دم دالو دینوم ده هی بخوراسوم گو دی دی یه کم پر ننهادی تیم .ره تی دار گو دار پر دم ،پر بز دم،بز شیر دم ،شیر دالو دم دالو دینوم ده هی بخوراسوم گو دی دی یکم أو نردی به پام. ره تی چشمه گو چشمه أو دم ،أو دار دم،دار پر دم،پر بز دم،بز شیر دم،شیر دالو دم دالو دینوم ده هی بخوراسوم گو دی دی یکم ریز نوندی منوم.ره ته ره گو ره ریز دم ،ریز چشمه دم،چشمه أو دم،أو دار دم،دار پر دم ،پر بز دم،بز شیر دم،شیر دالو دم دالو دینوم ده هی بخوراسوم گو دی دی یکم اسب ندوندی سرم .ره تی اسب گو اسب دور دم ،دور ره دم،ره ریز دم ،ریز چشمه دم ،چشمه أو دم،أو دار دم،دار پر دم،پر بز دم ،بز شیر دم ،شیر دالو دم دالو دینوم ده هی بخوراسوم گو دی دی نعل نکوفتی ته پام .ره تی نعل کو کو نعل کو نعل دم ،نعل اسب دم ،اسب دور دوم،دور ره دم،ره ریز دم،ریز چشمه دم،چشمه أو دم ،أو دار دم،دار پر دم،پر بز دم،بز شیر دم،شیر دالو دم دالو دینوم ده هی بخوراسوم گو دی دی یه تخم ندادی دست بچم .ره تی مرغ گو مرغ تخم دم ،تخم بچه نعل کو دم،نعل کو نعل دم،نعل اسب دم،اسب دور دم،دور ره دم،ره ریز دم،ریز چشمه دم،چشمه أو دم،أو دار دم،دار پر دم،پر بز دم ،بز شیر دم،شیر دالو دم دالو دینوم ده هی بخوراسوم گو دیدی یکم دون نوندی تیم .ره تی تاپو گو تاپو دون دم ،دون مرغ دم ،مرغ تخم دم، تخم بچه نعل کو دم، نعل کو نعل دم،نعل اسب دم،اسب دور دم،دور ره دم،ره ریز دم،ریز چشمه دم،چشمه أو دم،أو دار دم،دار پر دم،پر بز دم ،بز شیر دم شیر دالو دم دالو دینوم ده هی بخوراسوم گو دی دی یکم گل نزیدی کدوم .ره یکم گل اورد ز ی کد تاپو تاپو دون بس دا ،دون دا به مرغ مرغ تخم بس دا، تخم دا بچه نعل کو نعل کو نعل بس دا، نعل دا اسب اسب دور بس دا ،دور دا به ره ره ریز بس دا، ریز دا به چشمه چشمه أو بس دا، أو دا به دار دار پر بس دا ،پر دا به بز بز شیر بس دا ،شیر دا به دالو دالو دینس دا هی بخوراسوم ..