کیم بیلیر ایچیمده نه‌لر وار منیم؟

کیم بیلیر ایچیمده نه‌لر وار منیم؟

اوزومو گؤرنلر، گؤرمز اؤزومو
دنیزدن کؤپویو گؤرن گؤز کیمی.
کیم بیلیر ایچیمده نه‌لر وار منیم؟!
کول ایچینده اولان، یانار کؤز کیمی.

ایچیمده بیر چؤل وار، ایلان اویناغی
یانقی‌دان چاتلایار، سوسوز دوداغی
داغلار وار، اوره‌یی، آتش پوسکورر
باخارسان اود ساچار، سولغون یاناغی.

بیر اومسوق یازارین، اؤیکوسو ایتیب
بیر دلی شاعیرین، دیلی کسیلیب
بیر غریب وار، قالیب چن‌ده، دوماندا
بیر یورغون کروانین، یولو کسیلیب

ایچیمده خان آراز، آغلار آیریلیق
دلی‌کور، باشینی وورار، داشلارا
آجی‌چای هیچقیرار، گلمز نفسی
حسرتله گؤز تیکر، اوچان قوشلارا

ایچیمده بیر آنا، آغی اوخویار
بیر اوشاق ایمکلر، قوجاق آختارار
گؤزلریم شاختادی، قاردی، بوراندی
اوره‌ییم، آلوولو اوجاق، آختارار

ایچیمده انتحار، اؤلوم، سوی‌قیریم
قاچاقاچ، وورهاوور، دایان گئتمه، وار
تؤکولوب گؤوده‌لر بیر- بیر اوستونه
یوخومدا سسله‌نیر، قورشون خار هاخار

گئجه‌سی- گوندوزو، قارا دوستاق‌دیر
چکمه‌یه دؤزوم یوخ، قاچماغا، یول یوخ
قفسده یاشایان قارتال کیمی‌یم
قفسی آچماغا، اوچماغا، یول یوخ

ایچیمده تولکولر، قوردلار، قابانلار
هامیسی بیر به بیر، احرام باغلایار
بیر چاققال، آسلانا دوققوز گلمه‌یه
دوندان دونا گیرر، آلین داغلایار

آیلاردیر، ایل‌لردیر، یا دا چوخداندیر
ایچیمین گؤزگوسو، منه خور باخیر
اوزونو گؤرنلر، گؤرمور اؤزونو
بو کدر کؤنلونو، یاندیریر، یاخیر...