بارالها مرگ نازل کن وَ زندِی سیره دل

بارالها مرگ نازل کن وَ زندِی سیره دل
خوت خو بینی ساعتی صد بار هی ایمیره دل
درد دل نیبو کنی بُی آدمل مِن یی زمون
ایزنهِ گپ بُی خوش و بُی خینه و غم ایگیره دل
تَش بسی مِن جونه مو تا هی بسوزُم روز و شو
تش گروهتم خهکلونش آسمونَل ایره دل
مِن جوونی غصه دادی روز و شوم آوی یکی
سی غم و سی غصه خردن ای خدایا پیره دل
کشتِیِ تابوت ایخُم تا خلاص آوم وَ غم
از خشی دیدن وَ زندِی دهس دردُم دیره دل
سرگشته