مو چویله نورسم باد اوشنیمه

مو چٙویلِه نٙورٙسُم، باد اٙوشِنیمِه
بٙهرِه نٙیدُم، هاک گِریدِه تٙکِ ریمِه.

مو چٙویلِه نٙورٙسی، زِ کوه زٙرٙوی
بٙهرِه نٙیدُم. رٙهدومِه بِه یٙه دٙرٙوی.

مو چٙویلِه نٙورٙسی زِ کوهِ فِردون
بٙهرِه نٙیدُم. وٙستُمِه به کُنجِ زِندون.

مو چٙویلِه سٙوز و تٙر، چٙویلِه بودار
تٙش نٙهاد گُوشِه دِلُم، بیبٙفا روزِگار.

مو چٙویلِه نٙورٙسی زِ کوهِ سیلٙک‌
زیرِ بٙرفِ کُولٙک، شش ماه زٙنُم دٙک.

مو چٙویلِه نٙورِسی زِ کوه دِنایُم
کٙو‌گِ‌ تیلداری نِشٙستِه زیرِ سایُم.

مو چٙویلِه نٙورٙسی زِ کوهِ زٙردِه
ریشِه مو چُم زٙیدِه. سٙرمانِه خٙردِه.

مو چٙویلِه نٙورٙسی زِ کوه کٙلاروم
جورِ مٙشکِ دُو روزِگار, گٙلِ مٙلاروم.

مو چٙویلِه نٙورٙسی زِ کوهِ لیلِه
لاشِ سٙردُم، زِ روزِگار خٙردِه شیلِه.

مو چٙویلِه نٙورٙسی زِ کوهِ مُنگٙشت
بٙهرِه نٙیدُم. ریشِه زٙیدُم مِنِه وٙشت.

مو چٙویلِه نٙورٙسی زِ اُشتُرون کوه
بٙهرِه نٙیدُم. بِه دِلُم نٙمٙندِه نا و تُوه.

مو چٙویلِه نٙورٙسی. هٙی زیرِ بٙرفُم
بٙهرِه نٙیدُم. سٙرمٙل و پُر بیدٓه دٙرفُم.

مو‌ چٙویلِه وارِه بٙهار. بُو کُنِه مٙست
بٙهرِه نٙیدُم، دِلِه نازُکِه مو اِشکٙست.

مو چٙویلِه نٙورٙسی بِه تِلِه مُناروم
بٙهرِه نٙیدومِه زِ جٙوونی و بهاروم.

مو چٙویلِه نٙورٙسُم. بٙرگی نٙداروم
زیرِ بٙرفُم جورِ پار، مٙرگی نٙداروم.

مو چٙویلِه نٙورٙسی. چُم زٙید بِه ریشِه
زیرِ بٙرفُم جورِ پار. هاکُم تِلیشِه.

کـــــوروش دورکــــی بـــخـــتـــیـــاری