پنجره دن

پنجره دن

اؤز اولدوزونو آختاریر

خیردا قارداشیم

دیواردان آسیلمیش

آتامین شکلینه دالیرام

آیریلیق

چوخداندیرکی کؤک آتیب آرامیزدا

گونو گوندن

حیات وئریریک حسرته

یاشاییریق آجیلاری

بیر بیریندن آیری اللریمیز

یوللار آیریجینداییق...

هه

بئله اولماز قارداشیم

سن و من

بیز اولمالییق

قؤوشدورمالییق

دامجینی دامجییا

داغلاری داغلارا

گؤنش آختارمالییق

سحر ائرکن

ال اله

باغلا پنجره نی

باغلا قارداشیم

بو دردلی گئجه لردن

چوخداندیرکی اوغورلاییبلار

اولدوزلاریمیزی (مارال)