اَی که سِتینِ دلِ پیغُمبَری

اَی که سِتینِ دلِ پیغُمبَری
خوت تَک و تِهنا گُلِ نیلوفَری

سی تو زمین گوی جِیَرِس تَش گِرهد!
سی تو فلک بال و پَرِس تَش گِرهد!

سی تو سَراپانه سِیا کِردُمه
قیچیِ غم مینِ مِیا کِردُمه

تَک کُرِ بی دای زمونه تونی
سی همه ایل اَفتَوِ حونه تونی

سینه وَرِه داغِ تو وَر نیگِره
دار وَره ضربه توَر نیگِره

چاله تَشِ داغِ تو مِنْ جونُمه
صُحو و پَسین یادِ تو مهمونُمه

سی تو به زنجیر به سَر ایزنُم
تا چِلُمِت سیر به سَر ایزنُم

اَور گِرهده ز غمت آسِمون
تا که سَرِ نیزه نِهادِن قُرون

پوکِ غَمِت لاشه تَلو ایکُنه
ایلِ  سِیاپوشه کَلو ایکُنه

بی تو عزا نون و اَوِ مَردُمه
بی تو غَمِ عالَمِنه خَردُمه

جورِ تو کَس جونه فدا دین نکرد
چی تو دِلِ دشمنه کَس حین نکرد

چاله غَمِت سینه کِواو ایکُنه
قافیه شعرامه خِراو ایکُنه

چشمه زِ شَرمِت سِرِ زیر ایرِوه!
اَور زِ داغِت به گِریو ایرِوه!

سی تونه اَر زیرِ غم اَشکَستُمه
جورِ کُناری سَرِ رَه وَستُمه

دی کُمکُم کن که نسوسُم سِتین
خوم کَفِ پاهاته بِووسُم سِتین.