دسته دسته گلیب گئدر

دسته دسته گلیب گئدر
قوناقلار چیلله آخشامی
سحره دک قاش گؤز ائدر
چراغلار چیلله آخشامی

قاری ننه ناغیل دئییر
داغ، دره آغ دونون گئییر
یاناقلار گول دوداق غنچه
گلین لره گلر خونچا
تاباقلار چیلله آخشامی

هورولوبدی پنجره لر
دوزولوبدی شبچره لر
گئجه کئچر هئچ آچیلماز
یاتاقلار چیلله آخشامی

لبو حاضر پخله پیشیر
آش قئینه ییر قازان داشیر
کورسو ندن قورولماییر
اویناماقدان یورولماییر
اوشاقلار چیلله آخشامی

دینقیلداییر تار قاواللار
ایین لرده تیرمه شاللار
قیل و قالدی چال ها چالدی
هر ساعاتدا دول بوشالدی
اطاقلار چیلله آخشامی