داها ای گول منه سن یار وفادار اولاسان ایسته میرم

داها ای گول منه سن یار وفادار اولاسان ایسته میرم

ناز ائدیب غمزه ن ایله جام شرابیم دولاسان ایسته میرم

گنج ایکن سئچمه دین اصلا گؤزه لیم، بولبول ایله قارقانی سن

قوجالیبسان او کئچل باشینی هر آن یولاسان ایسته میرم

غمزه ن آتش لری یاندیردی منی غیر ایله همدم یاشادین

داها سن نازلی گؤزه ل سئومه لی بیر گنج اولاسان ایسته میرم

هیجرانین دردینه دؤزدوم سنی منده ن آییران اولدو جفا

بو یانار کؤنلومو سن قوی یانا، بیل کی سولاسان ایسته میرم

زولفونون بندینه وورغون یاشادیم بیرجه عؤمور نازلی پری

ایندی هئچ بوینوما ساچلارینی هر آن دولاسان ایسته میرم

سنین آردیندا ایتیردیم جانیمین قوتینی گؤز نورونو

بو سکوت ایله دولان دونیامی سسله بولاسان ایسته میرم

(سه س سیز)ه قطع نظر ائیله دین ای گول او زاماندان سارالیب

کؤکو کؤکدن قورویان اورمانا نئیسان اولاسان ایسته میرم