کؤنلوم دوتولوبدور، بیری یوخ دیل بیلن اولسون،

کؤنلوم دوتولوبدور، بیری یوخ دیل بیلن اولسون،
آچ بو قاپینی، منزله شاید گله ن اولسون!

بس آغلادیم، اولدو جیگریم قان یئتیر الله،
بیر کس گؤزومون یاشینی اوزدن سیلن اولسون.

یولداش منه چوخدور دولانیم عالمی شاید،
بیر کیمسه تاپیم دردیمه درمان قیلان اولسون.

اوخ هر نه ایتی اولسا گومان ائیله مه شخصین،
دونیادا شماتت کیمی باغرین دلن اولسون.

الله! بو شهین بختی دؤنوب، تختی دولانسین،
موشکول بونون عهدینده دوداغی گولن اولسون.

ای مایه سی آز! چوخ ائله مه ناله و فریاد،
سن دردیوی دی، بلکه دواسین بیلن اولسون.