چند دوبیتی لری بختیاری از "آرمان راکیان"

چند دوبیتی لری بختیاری از "آرمان راکیان"

ابیاتی که زنده کننده ی اصالت ایرانی و زبان پارسی ماست.

به گُرزِ کی طلسمِ غیرت إشکست 
گُـدارِ گـوگـرینه قهـرِ کـی بَست 
الا زنـگی ، یو سی باجِ سویلـِت 
چِتـو ایلُـم ز بردِ گـفتـری وَست 

*** 

برافتـو سایه ونـده اورِلـونه 
بهیگ زنده ئی، دُندال إخـونه 
دل آسـاره خـینه مینِ تاراز 
بزن هیجار"بهمن"مال کنونه 

*** 

تو افتووی ندونی دردِ شَونه 
سُواری کی کِشی بِندارِ رَونه 
تو که هاشق نبیدی پَل بُریده 
چتو وَندی به لاشُم تُهمِ تَونه 

*** 

مو درس آموزِ بردِ پیرِغارُم 
ستین بَردِ مشـروطه ودارم 
إترسم کُهتُـر آبـو بَـردِ ایلم 
نویسینِس به تیگِ روزگارم 

*** 

گُلُنـگِ خاطـرُم عیسِت کشیدُم 
زِ تـالِ بـاورم قـاوِس تنـیـدم 
کُلِه پِرقُُم مکن او مال و إی مال 
ایر جونـم بِسونی عیسِ نیدُم 

* * * 

ستینُم، وسدُمه چَه ، زی بیو دی 
فُتـورا سر دلُـم ره ، زی بیو دی 
چه وابیـده که رهـدم إز خیالت 
خیالم منده بی ره ، زی بیو دی 

*** 

دومـارِگُــل در آوردِن دمـــارُم 
خیـال رهــدن و منـدن نــدارم 
مو چی بیجن به جُستِ مه إگشتُم 
زمــونه چَـه درازی وَنـده بارم 

*** 

ز دَست خالک و خال و خیالِس 
چَکُم لَرسُم گـُـدردُم زیرِمـالس 
چکِ گُل چی دمِ تیغ اسـد خون 
سَـرُمِ أر بُـره ، خیـنُم حلالِـس 

*** 

کِلُـم زیـدی گدشتی تش به جـونِت 
دلم بونه گِرهد وی شون به شونت 
رک دی کِـف کلیـتِ خِفـتِ لـوته 
بیو جونم بسو سی ، زون گشونت 

*** 

شَده چـی شو گُـلالِ مهنه بَهسه 
سرِ میـنـاگـل آسـاره نشـهسـه 
دل إیگـو مَـوِدِ شوخیـن امشـو 
بهیگ آسمون جُم خرده ووهسه