یئنی بایاتیلار

یئنی بایاتیلار


عزیزیم آخارسولار
چایلاردان آخارسولار
یوللار اوزاق اولسادا
بولانماز آخارسولار

***

اوره ییم آتا آنا
قادالاری بو جانا
بوتون دونیا بیر یانا
آتا آنا بیر یانا

***

عزیزیم آتا آنا
دونیادی هر اینسانا
آتا آنانی آتیب
ویریلما هر جیرانا

***

عزیزیم سن گؤز اوسته
کاباب یانار کؤز اوسته
دوست دوستوندان اینجی یه ر
کینایه لی سؤز اوسته

***

عزیزیم بو دونیادا
چوخ زاد یازیلیر آدا
عومور باشا چاتاندا
هر بیر زاد قالیر یادا

***

عزیزیم بو دونیادا
اینسانلاری سال یادا
قوی اؤله ندن سونرادا
سالسینلار سنی یادا

***

عزیزیم اینسان یاشا
آز یاشا اینسان یاشا
شاعیر اولسان بو سؤزو
ایلک شعرینده یاز یاشا

***

عزیزیم چوخ دانیشما
هر مجلیسده دانیشما
سؤز اهلینده سؤز ائشیت
نادان خالقا قاریشما

***

عزیزیم بو دونیادا
عیدالت چؤنوب یادا
بیری دنیزی دوتوب
بیرینه چاتمیر آدا

***

عزیزیم آغلار گؤزوم
دالینجا آغلار گؤزوم
سنده سونرا دونیادا
بیر توستومدو بیر کؤزوم

***

ساچلارا باخ ساچلارا
آغاردی چؤندو قارا
ایللر بؤیو یاشادیم
اوره ییم یارا یارا

***

عزیزیم هر ائلچیه
ویریلما هر ائلچیه
اصلین تانی اصلین بیل
قیز وئرمه هر ائلچیه

***

عزیزیم هر اینسانی
اورکده ن سینا ، تانی
هر کیمسه اینسان اولماز
یارانمیشدی وار جانی

***

عزیزیم آپار منی
گول ائله آپار منی
ائل یولوندا ایتمیشم
ایتیرن تاپار منی

***

آجیخان چؤرک ایستر
قار توکن کورک ایستر
ظالیمین إوین ییخماق
بیر بؤیوک اوره گ ایستر

***

بوداغلار قار اولایدی
باهاری وار اولایدی
چوخدان گؤزوم یولدادی
اول گلن یار اولایدی

***

بوداغلاردان آشارام
سئل تک دولوب داشارام
وطنیمه یئتیشسم
ایللر بویو یاشارام

***

چتین گونده دوزه رم
دوستاقلاری چکه رم
وطنیمه یئتیشسم
توپراقینی اوپه رم

***

قارانلیقدان قاچارام
گؤنشه یول آچارام
وطن آدی گلنده
آدینا گول ساچارام

***

چوخ سئورم آتانی
سئومم اونو آتانی
شاعیرین گؤزه ل چاغی
اولار گونون باتانی

***

سؤزونو دی قانانا
سؤزچویه سؤزیازانا
هر زادین اوز اهلی وار
دئمه قویو قازانا