داد و بیدادم سی ایلم تکسواری نی دیه

داد و بیـدادم سی ایــلم تکـــسواری نی دیه

شـو گرهـمون ای خــدا افتـو دراری نی دیه

ای زمستون نیروه ، دی برف و سرما کشتمون

لاله و باویـنه و فــصل بـــهاری نی دیه

دشمـنون بخــتیـاری پا گــرهدن هم ز نــو

اسب و زین و برنو و شال و قطاری نی دیه

بنگ ام یک ، بنگ برنو، نیوریسته دی ز که

بردشیــری به ســر سیــنه مـزاری نی دیه

اسب منده بی سـوار و شیرعلیــمردونه نید

اوکری که شـاه ز ترسـس بو فراری نی دیه

نـادر افــشار رو فـکری بکن سی قنــدهار

ایــل آماده به جنـــگ قنــــدهاری نی دیه

ایلمون منده به جا ، بهمن ز نو سیمون بخون

میـنه سیـنه شـوق کوچ و گردواری نی دیه

حالو زال وا سر مزن کس گوشوحرفت نیکنه

فـاده ای ز ای همه فـریاد و زاری نی دیه

حالو زال و بهمن ومو حرفمون بی فایده ی

تا که چــوقا به ور پـیا بختـیاری نی دیه

ای خدا ایـبو اخیرس بخــتیاری بو یه ایـل

تا بیا روزی که بینم هفت و چاری نی دیه

دشمـنون شـوخی به مال شیرپیایل زیدنه

داد و بیــدادم سی ایـلم تکــسواری نی دیه