آیریلیقدان دئمه رم، بوردا آیاق ساخلاما گئت

آیریلیقدان دئمه رم، بوردا آیاق ساخلاما گئت
آیاق آلتینداکی ویجدانیمه بئل باغلاما گئت
بیلیسن گؤز یاشینی، گؤرسه فلک نئیله یه جک
سن او مظلوم آنالار لایلایی گل آغلاما گئت
قول بویون اولما، گومانلا قاریشان حسرتیمه
ماهنی سوزموش خیالی، ساز کیمی جیرماقلاما گئت
گؤزله دیک، بیز سحرین داغدان انیب، گلمه سینی
سن داها زیل گئجه، کرپیچ چینه دن بویلاما گئت
دوزدو من کؤنلومو وئردیم، زمیلر تک اوراغا
آمما گل یئل قوجاغیندا اوتوروب، لاخلاما گئت
داریخیر دونیادا فیکریم، سیخیلیر کؤنلومه جان
بالتالار یورغونودور بوینوما، قول آسلاما گئت
اوتاجاق هیسلی دنیز، رنگی بوزارمیش گونشی
هاردا سان دای دئمیرم، بوردا آیاق ساخلاما گئت
"پرویز سودی"