سیندیم بو گئجه پنجره نین لال باخیشیندا

سیندیم بو گئجه پنجره نین لال باخیشیندا
بیر لحظه دایان ساخلا آیاق سال باخیشیندا

قاردان قورتولان ماهنی لارین رنگی قارالمیش
آل قوینونا بو قارلی سازی چال باخیشیندا

گول غنچه سی عشقین یاراسین باغرینا باسمیش
ایللردی سینیر چرچووه نین کال باخیشیندا

هردن آچیلیر گویلری ظولمت گئجه لردن
هردن بویانیر آلما گولو آل باخیشیندا

خالسیز سئویرم گوزلرینه سئوگی جالانسین
بیر دامجی اوره کدیر جالانیر بال باخیشیندان

یول باغلی کوچه گوزلری دار گونده لیگینده
هرلحظه اوچوش واردی داریسقال باخیشیندا

گوزلردن ایراق قوللاریمی بوینونا سالدیم
سیندیم بو گئجه پنجره نین لال باخیشیندا.