ای بشر عبرت ایله یوخدی قالان دنیاده

ای بشر عبرت ایله یوخدی قالان دنیاده
چاتمیوبدور بیری مقصوده یالان دنیاده

نه گوزلدور حرکت ایلیه‌سن حقه ساری
حقیدن کسب ایلیه‌سن نام و نشان دنیاده

یاخشلیق ایلمک عالمده عبادتدی سنه
حقّ دیوب حقّی تانی حقّه اینان دنیاده

بونی‌بیل اَیری گیدن مقصدینه چاتمیاجاق
قالاجاق قبره گیدنجه نگران دنیاده

عمل آئینه کیمیندور یوخیا گیتمه بشر
تیز گوررسن بلنر یاخشی یامان دنیاده

هره بیر نحویله دنیانی وداع اِئتملیدی
یدی بو حادثه‌دن ساخلیاجان دنیاده