من سنه آی دئمرم آی سنه چاتماز گؤزلیم

من سنه آی دئمرم آی سنه چاتماز گؤزلیم
سنه حسرتده قالان دونیانی تاتماز گوزلیم

کؤنلومون تک گولوسن فخر ائدیرم ناز بویووا
عشقیوه حیران اولان دای سنی آتماز گوزلیم

قوی گؤزون قبله سینه هر گجه من سجده قئلیم
زاهدین سجده سی بو سجدیه چاتماز گوزلیم

آتگیلان غم کدری روی نگارینله گولوش
عاقل انسان باهارا غملری قاتماز گوزلیم

سن خیال ایله مه کی گل گئدیشین یوخ ثمری
اولماسا گئت گلیمیز غم گونی باتماز گوزلیم

مجنونون مثلی من چشم خمارین دلیسی
لیلی مجنونه بئله عشوه نی ساتماز گوزلیم

ترک قئلمیر منی بیر لحظه وصالین خیالی
بو خیالین ائله بیل گؤزلری یاتماز گوزلیم

بو غریب دنیادا کونلوم نجه آرام اولاجاق
یاتسا بختیم بیری بو بختی اویاتماز گوزلیم

عشق اولماسا گر، کل جاهان بیر داشا دیَمز
سئوداسیز اگر اولسا کؤنول بیر قاشا دَیمز

مردترک