نوستالژی

نوستالژی

خرنگ و تش و چاله یادش وه خیر
الختر و هــــوگاله یادش وه خیر

عجب روزگار خشی داشتیم
دو تا بز یه ماگی رشی داشتیم

دو تا توی خشتی یه کعب اشکنی
دو تا حور چمپی هفش ده منی

یه باغی که پر نار و انگور بی
یه کیسه مویزی که من حور بی

در و دشت و صحرا پره لاله بی
همی جا سرو و کل و گاله بی

زمهسون نرهته ، بهار ایرسی
خدا زورش وی روزگار ایرسی

ککی حرمتی داشت من ایلمو
خرابی نبی بین فامیلمو


سر کیچه ی دل کپر ایزدیم
یه شویه وه ده هونه سر ایزدیم


همی هونیل غرق لوخنده بی
خدا عشقه من کیچه وازنده بی

من ای کیچیل عشق پر ایکشی
سر بشمه انگور سر ایکشی

من ای کیچه مم لاله ای داشتم
شراب هفشساله ای داشتم

شرابی که چی دل خدا ساده بی
خرنگی که هف سال ویسایه بی

خرنگی که داغش وری سینمه
عزیز دل صاف و بی کینمه

عزیزی که مه نَ وه ری برده بی
تیش تشک افتونَ آزرده بی

تیش تشک افتون ایرختَ یک
نسه و برفتو نَ ایرختَ یک

برفتو وه افتوش جون ایگرو
نسه بی دوتا لوش جون ایگرو

دو تا لو که خرما کلوشه هنی
رطب عاشق خلق و خوشه هنی

دو تا لو که گل نار چی بنده شه
شرین و شکر هردو شرمنده شه

دو تا لو مگیتو دو نونه ی عسل
دو برگ بلندش دو ضرب المثل

دو تا مار زنگی دو ورمه ی پلش
دو شمشیر هندی دو تا برگلش

دو دریا تیه ،شهر شیر و عسل
خدا شرمش ایبی کنش من بغل
***
بغل واز کردم : که لاله ی مونی
خرنگ تر بند چاله ی مونی

خرنگی که سر لویلم گل کنه
غم و درد دیری ن جل جل کنه

ولی درد دیری مو چاره ی نداشت
گل لاله م انگا ستاره ی نداشت

تیی سور دنیا تش ار کرده بی
گل لالمه زیر سر کرده بی

زمهسون سه اومه سهلو رسی
گل لاله جونش وری لو رسی

گل لالمه باد ورتشکنا
کمر باغه ناریمه غم اشکنا

نه من گرمسیرم گل نار موند
نه من باغ سرحد سفیدار موند

تجی سوز انگوره سرما گره
فلک دلخشیمونَ وی ما گره

فلک چادر سهشه سر مال زه
کمون ارکشی دلمه من بال زه

***

شکال دلم خرده تیر بدی
دلم تنگه سی باغل سرحدی

دلم تنگه نینی بیارم بزن
بخون دی بلالی وه دارم بزن


وه دارم بزن بی دو ورمه ی پلت
حلالم کُ بی تیر مرزنگلت

حلالم کن و لاله ای وم بده
شراب هفشساله ای وم بده

یه لاله ی که رنگش تر و تازه بو
شرابی که تهلیش اندازه بو

شرابی که من جون مو گُل کنه
دوتا کشک زونی غمَ شل کنه

غم و درد و ماتم ومآبو جدا
صدی دی بلالم بره تا خدا

بپیچه صدی سازه من مالمو
برقصه فلک بی کل و گالمو

کل و گاله سر لو تو دونم خشه
اما لیکه تم سر لشم دلکشه

دلم تنگه بی پلته دارم بزن
یه کل شاکلی سر مزارم بزن

دلم ایخو که جونه جونم کنی
خرنگم بریزی غزونم کنی