لە بۆنی هەناسانی تۆوە

لە بۆنی هەناسانی تۆوە
گوڵە شلێر دەڕوێ
لەو کاتەوە
چاوەکانت گریاونەتە نێو دەریا
تا ئێستا هەڵ دەقوڵێت
ئاسۆ
لە پشتی گلێنەی چاوی تۆوە هەڵ دێت
سرووشی عەشق
لە نێو ڕۆشنایی پرچە سپی بووەکانی تۆوە بۆ نوێژ هەڵ دەستێت
دایە گیان
وا دووباره و دووبارە و دووبارە
زانیم ژوانی تۆ
ڕاستەقینەترین ژوانە
بۆیە دەڵێم
دایکم خەزانەی ژوانی ژینمە
بۆیە دەڵێم
گریانم شێعری شەوانی خەمی تۆیە