سئوگیلیم ائل بیلیر من اهل دردم

سئوگیلیم ائل بیلیر من اهل دردم
سندن باشقاسینی سئوسم نامردم
غصه دن اؤلورم نئیلیم کی، هردم،
منی قویوب باخیر یانا گؤزلرین.

کیپریگین خنجردیر، قاشلارین کامان،
ییخدیغین عاجیزه وئرمزسن آمان.
دئدیلر جلّادسان، ائتمزدیم گومان،
سالاجاقدیر منی قانا گؤزلرین.

سنین الینده دیر هر اختیاریم،
ظالیم،اؤلدور منی غمدن قورتاریم،
بس کیمه سؤیله ییم، کیمه یالواریم،
گتیریب دیر منی جانا گؤزلرین.

کؤنلومو سالاجاق زولفون کمنده،
حسرتین قویماییب جان قالسین منده،
او گؤزلر وار ایکن نه قدر سنده،
آلاجاق کؤنلومو سونا گؤزلرین.

واحیدم ،سئوگیلیم، منده قانیرام،
فتنه کار گؤزلی اوزدن تانیرام،
نئجه دئییم سنه، غمدن یانیرام،
منیم تک اود توتوب یانا گؤزلرین